Mees Algemene Vrae (FAQ's)

Antwoord:

1. Konsultasiefooie word gehef volgens die riglyne van die Board of Healthcare Funders (BHF). Hierdie praktyk is by die meeste mediese fondse gekontrakteer.
2. Mediese fonds-tariewe word gehef volgens die toepaslike fonds se tarief vir konsultasies in die 51 tot 60 minute tydsgleuf.
3. Neem asseblief kennis dat die werklike duur van ‘n sessie korter as 51 tot 60 minute mag wees, aangesien tien minute administratiewe tyd by hierdie tydsgleuf ingesluit is.
4. Indien jy nie aan ‘n mediese fonds behoort nie, of indien jou voordele uitgeput is, beloop my privaat tarief R1 100 per sessie. Betaling kan per kontant, kredietkaart of elektroniese fondsoorplasing (EFT) geskied.
5. Hoewel ons van die nuutste tegnologie gebruik maak om jou onmiddellik in kennis te stel wanneer jou mediese fondsvoordele uitgeput is, beveel ek aan dat jy ook self by jou mediese fonds navraag doen oor jou jaarlikse voordele. Te veel kliënte kom eers agter dat hul voordele uitgeput is wanneer hulle met ‘n groot rekening gekonfronteer word. Dit bly egter jou verantwoordelikheid om ingelig te bly oor jou beskikbare voordele. Indien jou voordele uitgeput is, mag jy moontlik vir die laer privaat tarief kwalifiseer.
6. Sekere toestande, soos depressie en veral bipolêre gemoedsversteuring, word deur die sogenaamde Voorgeskrewe Minimum Voordele (PMB’s) gedek. In sulke gevalle is jou mediese fonds wetlik verplig om die koste van hierdie sessies te dek, sonder dat dit van jou algemene voordele of mediese spaarrekening verhaal word. Kontak asseblief jou mediese fonds om ‘n PMB-vorm aan te vra. Ons sekretaresse kan jou ook hiermee behulpsaam wees.
7. Volgens die praktyk se beleid moet afsprake minstens 24 uur vooraf gekanselleer word.
8. Ons is egter ook mense en verstaan dat daar soms geldige redes is waarom jy nie ‘n afspraak kan nakom nie. Indien jou afspraak deur ‘n ander kliënt gevul word, sal jy nie daarvoor aanspreeklik gehou word nie.
9. Sou jy jou afspraak vergeet of dit nie bywoon nie, sal jy vir die rekening aanspreeklik wees.
10. Ons behou die reg voor om ‘n mediese sertifikaat aan te vra indien jy weens siekte kanselleer, of ‘n brief van jou werkgewer indien die laat kansellasie werkverwant is.
11. Rente mag op agterstallige rekeninge gehef word.
12. Sou jy nie jou afspraak nakom nie, mag jy weer op die waglys geplaas word.

Antwoord:

1. Dit is uiteraard onmoontlik om vooraf te voorspel hoe lank terapie sal duur. Die duur van terapie verskil net soveel soos die mense en die uitdagings waarmee hulle te doen kry.
2. Die meeste kliënte benodig gemiddeld tussen vier en agt sessies. Jou eie unieke uitdaging mag eenvoudiger of meer kompleks wees, wat die aantal sessies wat ons benodig, kan beïnvloed. Ek onderneem om so vinnig en doeltreffend moontlik te werk ten einde tyd en koste te bespaar.
3. Jy bepaal grootliks die rigting en verloop van die terapie. Dit beteken ook dat jy grootliks die bestuur van ons tyd bepaal. Ek sal van tyd tot tyd voorstelle maak, maar indien jy graag hipnose of enige ander terapeutiese intervensie tydens ‘n sessie wil doen, benodig ons minstens ‘n halfuur van ons sessie daarvoor.
4. Ons gaan die eerste sessie gebruik om jou uitdaging te verken. Ek moet eers ‘n goeie begrip van jou uitdagng vorm, en dit mag gebeur dat jy nie noodwendig baie voordeel uit die eerste sessie gaan put nie. Die eerste sessie gee ook vir jou die geleentheid om self te bepaal of jy gemaklik daarmee is om met my saam te werk, al dan nie.
5. Terapie help jou ook om weer met jou intuïsie in aanraking te kom, en jy sal instinktief net weet wanneer ons die einde van die terapeutiese proses bereik het.

Antwoord:

Ek sien my kliënte gewoonlik een keer per week.

Volgens my ervaring neem dit jou onderbewuste ongeveer ‘n week (sewe dae) om ‘n terapeutiese intervensie te verwerk en te integreer. Eers ná ongeveer sewe dae kan ons gewoonlik bepaal wat die volgende stap behoort te wees.

Sommige kliënte verkies om elke twee weke of selfs een keer per maand afsprake te maak. Jy

Antwoord:

‘n Sessie duur gewoonlik tussen 41 en 50 minute. Jy word egter volgens mediese fonds tarief vir konsultasies van 51 tot 60 minute gehef, aangesien tien minute vir administrasie bygereken word.

Indien jy laat is vir jou afspraak, sal ons poog om die beskikbare tyd so goed moontlik te benut. Indien ék laat is vir ons afspraak, is dit my probleem!

Antwoord:

Wanneer terapie begin, word die eerste sessie gewoonlik gebruik om:

• vas te stel wat presies jou probleme of uitdagings is;
• te bepaal hoe ons dit verstaan en interpreteer; en
• ‘n voorlopige behandelingsplan saam te stel.

Die terapeutiese proses begin meeste van die tyd eers tydens die tweede sessie. Dit mag ook gebeur dat jy gedurende die tweede sessie nog verder op uitdaging wil uitbrei. My primêre taak is om na jou te luister, te verstaan, die proses te fasiliteer en terugvoer te gee.

Hoewel jy altyd in beheer van ons sessies is en die tydsbestuur daarvan bepaal, sal ek waar dit nodig is, leiding bied.

Dit is egter belangrik dat jy die verloop van ons sessies bepaal. Indien jy dit wou verkies om tydens sessies bloot te gesels of jou hart uit te praat, is dit my primêre taak om te luister, vrae te vra en terugvoer te gee. Ons sal eers terapeutiese tegnieke begin toepas wanneer jy voel dat jy jou sê gesê het. Om oor jou uitdaging te praat, bly steeds die kern van psigoterapie. Jy sal wel net weet wanneer jy klaar gepraat het en gereed is om met terapeutiese tegnieke te begin.

Antwoord:

Ek sal nooit daardie besluit namens jou neem nie. In die sielkunde het ons ongelukkig nie bloedtoetse, ‘n stetoskoop, X-strale of enige ander objektiewe maatstawwe te bepaal wanneer behandeling voltooi is nie.

Jy sal self op ‘n stadium net die gevoel kry dat jy my nie meer hoef te sien nie. Dit mag dalk vir jou begin voel dat jy nie meer voordeel uit die terapie put nie, of selfs dat die terapie vir jou begin vervelig raak. Dit kan jou onderbewussyn se manier wees om vir jou te vertel dat jy gereed is om die terapie af te sluit.

Die lewe gebeur maar. Daar mag weer iets gebeur wat ou emosies of reaksies mag aktiveer. In so ‘n geval is jy altyd welkom om weer ‘n afspraak te maak te eniger tyd.

Sommige kliënte keer wel terug, sommige na ‘n baie kort breuk, en andere eers ná jare. Hulle kom soms vir een of twee opvolgsessies terug, en soms begin hulle ‘n nuwe terapeutiese proses, afhangende van hul omstandighede, nuwe traumas of veranderde behoeftes.

Antwoord: :

Hierdie praktyk volg ‘n eklektiese benadering. Dit beteken dat ek gebruik maak van verskillende terapeutiese benaderings binne die sielkunde, afhangende van jou eie unieke behoeftes.

Die praktyk fokus egter veral op moderne en alternatiewe terapeutiese benaderings. Lees gerus meer hieroor op my webtuiste.  Voel egter ook vry om my enige tyd meer hieroor te vra.

Ek maak spesifiek gebruik van moderne, vinnige en effektiewe terapeutiese stelsels om die beste moontlike resultate in die minste moontlike aantal sessies te bereik.

Lees gerus meer op my webtuiste oor:

• Kliniese Hipnose
• BWRT
• NLP
• EcCT
• Sielvolheid
• Positiewe sielkunde

Ek is egter ook opgelei om meer tradisionele, langer termyn terapie te doen, sou jy dit verkies.

Antwoord:

Ten opsigte van vertroulikheid dra ek ‘n groot verantwoordelikheid teenoor jou en die inligting wat jy deel. Sielkundiges is onderworpe aan ‘n streng etiese kode wat daar gestel is deur die Health Professions Council of South Africa (HPCSA). Hierdie kode waarborg jou, as kliënt, te alle tye professionele en etiese gedrag van my kant. Indien ek nie aan hierdie kode voldoen nie, kan jy my by die Raad gaan verkla. ‘n Afskrif van die kode kan by ons ontvangsdame aangevra word, by admin@jorganharris.co.za.

Een van die belangrikste aspekte van die terapeutiese verhouding is vertroulikheid. Wees ten alle tye bewus daarvan dat die inligting wat jy met my deel, deurentyd as streng vertroulik hanteer sal word. Ek mag slegs inligting oor jou bekend maak indien jy vooraf skriftelike toestemming daarvoor gee. Ek is nie eens toegelaat om inligting aan jou eggenoot, ouers of kinders bekend maak sonder jou skriftelike toestemming nie.

Vertroulikheid word deur die wet sowel as deur die HPCSA se etiese reëls beskerm, selfs indien jy ‘n minderjarige is.

‘n Hof mag my in sekere omstandighede verplig om inligting bekend te maak. Indien dit sou gebeur, doen ek dit gewoonlik onder protes. Selfs dan sal ek slegs die minimum noodsaaklike inligting bekend maak en alles binne my vermoë doen om jou vertroulikheid te beskerm.

Volgens my ervaring erken howe oor die algemeen die belangrikheid van terapeutiese vertroulikheid en beperk hulle die openbaarmaking van vertroulike inligting waar dit enigsins moontlik is.

Antwoord:

Jy het nie ‘n verwysing van ‘n dokter of enige ander persoon nodig om ‘n afspraak te maak nie.

Jy kan eenvoudig uit eie keuse besluit om ‘n afspraak te maak.

Antwoord:

Baie mense voel angstig voor hul eerste afspraak. Gelukkig is daar baie min rede om bekommerd te wees.

Die atmosfeer in my kantoor is gemaklik en ontspanne. Ons maak ook gebruik van voornaam terme en praat in terme van jy en nou, selfs al is jy minderjarig.

Terapie is ‘n verhouding. Ek wil graag hê dat jy so gemaklik as moontlik kan voel. Voel daarom altyd vry om vrae te vra of aan my te sê indien enigiets jou onseker of ongemaklik laat voel.

Jy sal nooit veroordeel of beoordeel word nie – slegs verstaan word. ‘n Sielkundige is nie ‘n regter nie, maar iemand wat wil verstaan en wil begryp waar jy vandaan kom. Professionele sielkundiges streef daarna om mense te verstaan eerder as om oor hulle te oordeel.

Antwoord:

Dit is ‘n uiters belangrike vraag.

Geen sielkundige behoort ooit enige persoon te veroordeel nie. Die doel van die sielkunde is om menslike gedrag te verstaan en mense te help om nuwe moontlikhede en alternatiewe te ontdek.

Jy sal nooit op enige aspek van jou lewe veroordeel word nie, en veral nie op grond van jou:

• Seksualiteit
• Godsdiens
• Ras
• Opinies
• Verlede
• Foute
• Suksesse en jou
• Lewe

nie.

Veroordeling beperk begrip en uiteindelik ook terapeutiese uitkomste. Jy moet veilig kan voel om net jou hart oop te maak sonder vrees vir veroordeling.

Veroordeling beperk nie net jou groei nie, maar dit beperk ook die vermoë van jou terapeut om te help. Hier sal jy die heeltyd met onvoorwaardelike begrip, respek, agting en professionele etiese optrede behandel word.

Antwoord:

Hier ryg ons nie derms uit nie. Ons wil jou nie verder traumatiseer nie.

Baie bewysgebaseerde traumaterapieë behels steeds dat traumatiese herinneringe herroep en verwerk word, hoewel dit op ‘n gestruktureerde en deeglik beheerde wyse geskied.

Dit is juis een van die besondere eienskappe van breingebaseerde psigoterapie. In meer tradisionele terapie word daar dikwels gewerk om nuwe insig te verkry. Daar is goeie wetenskaplike bewyse dat insig alleen dikwels nie voldoende is om blywende verandering teweeg te bring nie, hoewel baie terapeutiese benaderings steeds daarop steun as ‘n belangrike meganisme vir verandering.

Jou uitdaging lê hoofsaaklik in jou sogenaamde reptielbrein – daardie primitiewe deel van die brein wat voortdurend op oorlewing ingestel is.

Hierdie deel van die brein verstaan nie noodwendig alles wat gebeur nie, maar dit is wel in staat om anders te reageer en jou beter te laat voel. Selfs al verstaan jy nie ten volle wat tydens die terapeutiese proses gebeur nie, sal jy dikwels eenvoudig opmerk dat jy beter voel, sonder dat daar derms uitgeryg word.

Dit is dus jou keuse om jou uitdaging volledig te verstaan, maar steeds nie beter te voel nie. Of jy kan ook kies om nie alles volledig te verstaan nie, maar wel beter daaroor te voel.

Laasgenoemde is die benadering wat ons in hierdie praktyk volg.

Antwoord:

Ja. Ek doen wel aanlyn-terapie.

Ek het kliënte regoor die wêreld wat via die internet met my konsulteer. Ek verkies om van WhatsApp-videobel of Skype gebruik te maak.

Aanlyn-terapie werk uitstekend vir feitlik alle vorme van psigoterapie, insluitend alternatiewe terapeutiese benaderings soos BWRT en kliniese hipnose.

Antwoord:

Klik asseblief op Kontak Ons op my webwerf.

Daar sal jy al die verskillende maniere vind om ‘n afspraak te maak.

Antwoord:

Ek maak nie noodwendig daarop aanspraak dat ek anders is as ander sielkundiges nie.

Ek is steeds ‘n kliniese sielkundige wat na jou sal luister, sal probeer verstaan en ten volle daar te wees vir jou.

My styl mag egter soms – of selfs meestal – die volgende wees:

• Meer direk
• Taakgerig
• Gefokus daarop om probleme so vinnig en doeltreffend moontlik op te los
• Deur sommige mense as ‘n reguit, geen nonsens-benadering ervaar
• Soms baie empaties, en soms heelwat minder
• Humoristies, selfs wanneer dit beteken dat ek hiermee ironie uitwys

Ek mag selfs my skoene uitskop, want ek glo nog altyd ek kan nie behoorlik dink met skoene aan nie!

Lees gerus die Tuisblad van my webwerf indien jy meer wil weet oor my agtergrond in die sielkunde en my terapeutiese benadering.

Antwoord:

In ‘n sekere sin is niemand se uitdagings ooit regtig ernstig genoeg nie. Daar is altyd mense wat groter probleme as ons het. Daar is lyding, hongersnood, oorlog, oorlewingsuitdagings en nog baie meer.

Is jou uitdaging dan werklik ernstig genoeg? Miskien is dit tyd om op te hou om jouself met ander te vergelyk. As jou probleem vir jou ernstig is, dan is dit ernstig. En dit is ernstig genoeg vir my.

Dit hoef nie eens ‘n ernstige probleem te wees nie. Sielkunde kan ook gesien word as ‘n manier om jou lewenskwaliteit te verbeter.

Ons gun onsself almal van tyd tot tyd ‘n duur vakansie, ‘n massering of ‘n ander luuksheid. Jy mag ook vir jouself die geleentheid gun om in terapie te belê.

Antwoord:

Dit is ‘n vraag wat baie mense vra, en dit is ‘n belangrike onderskeid om te verstaan: Ek is ‘n Kliniese Sielkundige en nie ‘n Psigiater nie.

Slegs ‘n psigiater of jou huisdokter kan medikasie voorskryf. Ek kan jou egter help om ingeligte besluite oor medikasie te neem en kan, indien nodig, aanbevelings aan jou huisdokter of psigiater maak. Die voorskryf van medikasie val egter buite my professionele praktyk en bevoegdheidsgebied.

Antwoord:

Hierdie praktyk fokus op adolessente en volwassenes vanaf die ouderdom van 16 jaar.

Kindersielkunde is ‘n hoogs gespesialiseerde veld, en daarom verwys ek kinders gewoonlik na sielkundiges wat spesifiek in die behandeling van kinders spesialiseer.

Antwoord:

Ek is ‘n Kliniese Sielkundige en behandel ‘n wye verskeidenheid toestande wat algemeen binne die kliniese sielkunde voorkom.

Besoek gerus die Terapeutiese Fokus-afdeling van my webwerf vir meer inligting oor die spesifieke areas waarin ek ‘n besondere belangstelling het.

Antwoord:

Dit is vir my belangrik dat jy die grootste moontlike voordeel uit jou terapeutiese proses put.

Indien jy enige vrae oor hierdie dokument het, voel asseblief vry om dit met my te bespreek. Indien daar enigiets rondom terapie is waaroor jy onseker voel, moedig ek jou aan om dit met my te bespreek. Dit kan die terapeutiese proses benadeel indien jy oor iets ongelukkig is of voel dat jy my nie ten volle kan vertrou nie.

Stuur gerus vir my ‘n e-pos na jorgan@jorganharris.co.za. Ek antwoord graag jou navrae

Ek hoop dat jy terapie sal ervaar as ‘n geleentheid vir groei en persoonlike ontwikkeling -‘n ontdekking van hoe eenvoudig dit regtig kan wees om net te leef.

Terapie kan die lewe makliker maak.